1Ch 15 | MEU | STEP | David na ruma haida e haginidia ia sibona ena, David ena hanua ai; bona Dirava ena maua helaḡana gabuna e lailaia, bona kalagana e haginia.

1 Chronicles 15

Maua helaḡana na Ierusalem ai e daralaia dae

1 David na ruma haida e haginidia ia sibona ena, David ena hanua ai; bona Dirava ena maua helaḡana gabuna e lailaia, bona kalagana e haginia. 2 Bena David eto, Asi tauna ta ese Dirava ena maua helaḡana baine huaia, a Levi taudia mo; badina be Iehova ese vada e abidia hidi, Iehova ena maua helaḡana bae huaia bona ia isiaina bae lao heni ela bona hanaihanai. 3 Bena David ese Israel taudia iboudiai e haboudia Ierusalem ai, Iehova ena maua helaḡana na ena gabu, vada e heḡaeḡaelaia gabuna, ai bae daelaia totona.

4 Bena David ese Aaron garana ona Levi taudia e haboudia. 5 Kohat garana amo: Uriele, tau lohia, mai varavarana sinahu-ta ruahui. 6 Merari garana amo: Asaia, tau lohia, mai varavarana sinahu-rua ruahui. 7 Gereson garana amo: loel, tau lohia, mai varavarana sinahu-ta toi-ahui. 8 Elisafan garana amo: Semaia, tau lohia, mai varavarana sinahu-rua. 9 Heberon garana amo: Eliele, tau lohia, mai varavarana taurahani-ahui. 10 Usiele garana amo: Aminadab, tau lohia, mai varavarana sinahu-ta gwauta-rua. 11 Bena David ese hahelaḡa taudia Sadok bona Abiatara, bona Levi taudia Uriele bona Asaia bona Ioel bona Semaia bona Eliele bona Aminadab e boiridia, 12 e hereva henidia, eto, Umui na Levi taudia edia iduhu kwaradia; sibomui ba hahelaḡa, umui bona varavaramui danu; Iehova, Israel Diravana, ena maua helaḡana vada na heḡaeḡaelaia gabuna ai ba daelaia totona. 13 Nega gunana ai asie huaia dainai, Iehova, eda Dirava, ese e makohi dagu henida; badina be asita naria namonamo, taravatu heḡereḡerena. 14 Taunabunai, hahelaḡa taudia bona Levi taudia na sibodia e hahelaḡa, Iehova, Israel Diravana, ena maua helaḡana bae daelaia totona. 15 Bena Levi taudia ese Dirava ena maua helaḡana na mai madunana ida paḡadia ai e huaia, Mose ese Iehova ena hereva amo e haḡanilaidia dalana heḡereḡerena ai.

16 David ese danu Levi lohiadia na e haḡanidia, varavaradia haida bae duanaidia, ane bae abi, bona reḡereḡe ḡaudia idau-idau, hatai-hatai ḡaudia badadia bona maraḡidia bona botabota ḡaudia, ihataidia bona ibotadia amo moale reḡedia bae hadae badabada. 17 Taunabunai, Levi taudia ese Hemana Ioel e duanaia, varavarana ta Asaf Berekia ida; bona varavaradia Merari garana amo, Etana Kusaia; 18 bona idia ida ma varavaradia haida orea iharuana ai, Sekaria, Iaasiel, Semiramoto, Iehiele, Uni, Eliab, Benaia, Maaseia, Matitia, Elifelehu bona Mikineia; bona ikoukou igimadia taudia, Obed-edom bona leiele. 19 Ane-abi taudia Hemana bona Asaf bona Etana na aurilaboralabora botabota ḡaudia bae botadia; 20 Sekaria, Asiele, Semiramoto, Iehiele, Uni, Eliab, Maaseia bona Benaia na hatai-hatai ḡaudia badadia bae hatai, Alamoto dalana ai; 21 a Matitia, Elifelehu, Mikineia, Obed-edom, Ieiele bona Asasia na hatai-hatai ḡaudia maraḡidia bae hatai, Seminiti ^{▼▼“Alamoto”; “Seminiti”. Ini na Heberu taudia edia ane iabidia eiava ihataidia daladia herevadia; a anidia korikori vada e boio.} dalana ai. 22 Kenania, Levi taudia edia ane-abi igunalaina tauna, ese ane baine hakaua, badina be ia na mai dibana. 23 Berekia bona Elkana na maua helaḡana ena ikoukou igimana taudia ai baela. 24 Hahelaḡa taudia Sebania, Iosafat, Netanele, Amasai, Sekaria, Benaia bona Eliesere na kibi bae hiriri. Dirava ena maua helaḡana vairanai. Obed-edom bona lehia danu na maua helaḡana ena ikoukou igimana taudia ai baela.

25 Taunabunai David bona Israel tau-badadia bona daha lohiadia na ela, mai moaledia ida Iehova ena taravatu mauana Obed-edom ena ruma amo bae daelaia totona. 26 Bena Dirava ese Levi taudia, hari Iehova ena taravatu mauana e huaia taudia, na e durudia dainai, idia ese boromakau mamaruanedia hitu bona mamoe mamaruanedia hitu na e abidia, boubou ḡaudia ai e halaodia. 27 David na dabua aukana namo-hereana e hahedokilaia; bona Levi taudia maua helaḡana e huaia, bona ane-abi taudia, bona Kenania, ane-abi igunalaina tau, danu dabua unuhetomadia e hahedokilai. David danu hahedoki helaḡana, dabua aukana amo e karaia ḡauna, e hahedokilaia. 28 Taunabunai, Israel idoinai ese Iehova ena taravatu mauana e daelaia, mai honedia bona mai kibi idau-idau bona botabota ḡaudia reḡedia ida; bona hatai-hatai ḡaudia badadia bona maraḡidia e hatai lalo-dika danu.

29 Iehova ena taravatu mauana na David ena hanua ai e kau negana ai, Mikala, Saulo natuna hahinena, na gaba-mauru amo e igo lasi, bena King David e itaia, e mavaruva bona e galaḡalava; bena lalona amo e ihi-ihiraia.